Kali Bekasi

Relief Tugu Kali Bekasi

Oleh Oman AR
Nurut riwayat, Kali Bekasi ngegalihnyah pake batok klapa, nyang dikerjain dewekan ama kesatria sakti mandraguna, namanyah ora begitu danta tapi masih ada kaitanah ama Raja Purnawarman nyang nyohor mimpin Tarumanagara ampe gini ari. Panjang jalur kerjaanah ora nanggung-nanggung, mulain dari bela’an kidul ujung Bogor ampe ke bla lor Muara. Besyukurah zaman ganu ora ada tender-tenderan, apalagi ampe ada panitia lelang, cukup ge lewat jalur pe-el, prentah langsung nyang punya kuasa, itu gawean udah langsung jatoh ke tanganah.
Ora pake takut bakal kena sanksi dari lembaga antikorupsi. Apalagi ampe digrecokin oknum el-es-em, nyang dikwatirin cumen atu, kalu ampe boncos ntuh gawean, dijamin kepala si penerima tugas bakal misah dari badanah. Craaasss, nglinding kepunggel bendo nyang diasah sang algojo slama tiga ari tiga malem.

Kalu ngutip tulisan bang Andi Sopandi, dosen nyang juga editor buku Profil Budaya Masyarakat di Kota Bekasi, paling kagak gambaran orang Bekasi kalu dapet prentah sikapnya rada-rada mirip begituh. Sengkilang orang Bekasi emang dimasupin jadi mesrakat transisi (plural), cumenan sikapnyah mah ora ampe kegerus pisan. Emang ge ada nyang rada bingung karna kudu mastiin sapa diah sebenernyah. Tapinyah justru malah kuwat karna adanyah perpaduan tadi.

Tapi balik lagi dah ke crita mula-mula. Emang dasar orang zaman ganu, itu tugas bisa diberesin. Pedahal cara kerjanyah ora maen-maen, kaga pake nyambat orang sekampung. Cukup semedi, komat-kamit sebentar, trus brenggat loncat sonoh-loncat sini sambil tanganah nyerokin tanah, persis tukang kecopok nyodok daganganah pake sendok. Singkat kata, kelar dah itu kerjaan, aer pun mulain ngocor dari ujung gunung ampe ke pinggir laut, ngglosor kaya ula kadut nrobos lumpur di galengan sawah.

Nyang namanyah aer gunung, murun beningah ora ketulungan. Saking beningah, ikan nyang pada nguyur di Kali Bekasi, kaya ikan keting, baung, sili ama lempuk nyang lagi megal-megol di dalemah, kelietan ampe danta sedanta-dantanyah. Mesrakat nyang berumah di tebingan kali juga pada manpaatin aer Kali Bekasi buat keperluan idupnyah, mulain dari mandi, nyuci ampe nyang laen-laenah.

Cumenan sayangah, makin ke sinih, itu kali jadi kaya ora keurus. Aerah ora bening lagi tapi butek. Bukanah cumenan butek doangan tapi juga bau. Kata nyang demen ngamatin lingkungan, itu aer udah kecemar kotoran ama limbah pabrik. Bujug buneng, murunan kalu kesatria sakti mandraguna nyang bikin Kali Bekasi tau hasil karyanyah ora dirawatin malah dicemarin, jangan-jangan nyang nyemarin ntuh kali bakal disumpain jadi biawak buat nyaplokin bangke nyang kanyut ke bawa aer kali. Ora takut apah?(Pegiat Budaya Bekasi)