Jassin

Namanya nyohor ke manah-manah, bukanah cumen di gomplokan tesen seumuranah, malahan ampe bocah kecit nyang masih make sragam kolaan ge ngilu gundam ama dirinyah.

Jassin emang manusa luar biasa, lewat tanganah banyak nongol manusa-manusa hebat. Pedahal kalu ndenger crita dari muridah ama tesenah, manusa nyang atu inih emang sering diagul-agulin punya sikap teges kalu udah ngkritik hasil gawean orang laen.

Malahan Profesor Dawam Rahardjo, nyang pernah jadi Rektor di Universitas Islam’45 Bekasi pun, ngilu ngasih pontenan buat mahluk Tuhan bernama Jassin ituh. “Dulu dia dianggap bisa nentuin masa depan seseorang,” katanyah pas dimintain komentarah.

Belon lagih tesen-tesenah nyang laen, nyang ngaku bisa ngiterin dunia, bisa pegih ke Amerika, Eropah ama negeri di jajirah Arab karna ora lepas dari jasanyah Jassin. “Dia itu guru sayah,” kata tesenah nyang laen nyang ampe gini ari masih tenget ama kebaekan Jassin. “Di adepanah semuah orang ituh ora ada bedanyah,” sambung nyang laenah.

“Jassin ora prenah mbedain bocah kecit nyang masih pake sragam kolaan ama pejabat nyang punya pangkat. Semuahnyah diperlakukan sama. Kalu tamu-tamunyah pada mo pulang umpama abis ketemuan ama diah, Jassin ora ada bosenah nganterin ampe ke depan pintu kantorah atawa batian rumanyah,” temenah nyang pernah diajak kerja ngilu nerangin.

Hebatah, Jassin ora prenah jadi goden palanyah. Buat diah sanjungan atawa pujian ora di nenebih dalem ati, kalu emang mo bebuat baek ya udah ajah bebuat baek, ora pake ngitung untung apah tekor. Apalagih ampe nungguin nyang ditulungin bakalan nengetin kebaekanah tadi. Ora bakalanah Jassin ampe mao ngalamin nyang kaya beginian. Murunan Jassin paham ama nyang namanyah borok sikutan alias pemali kalu udah ngasih orang trus nyang dikasih dimintain lagih. Jassin juga dianggap manusa nyang bisa ngliat perbedaan sebagai keindahan.

Sayangah, Jassin kudu lebih dulu nduluin kita. Tapinyah ampe karang ge namanyah masih sering disebut-sebut orang. Kebaekanah, kesederhanaanyah atawa sikap-sikapnyah nyang laen nyang bikin orang pengen trus tetep mengenangah.

Mengkanyah kita ngarepin di negri inih banyak lahir Jassin-Jassin nyang laen, nyang punya sikap ora beda jauh ama Jassin nyang kita critain. Jassin nyang kita maksud di sinih ora laen Hamzah (nyohorah Hans) Baque Jassin atawa HB.Jassin nyang berjuluk “Paus Sastra Indonesia” nyang pas 11 Maret maren di Taman Ismail Marzuki dibikinin acara buat ngenang 12 taun kepegianah oleh murid-muridah juga tesen-tesenah, kayak bang Edo, bang Oyon, Gerson Poyk, A.D. Donggo, Lili Munir dan nyang laen-laenah. (oman AR)